1ª Puyada Popular B.T.T. ta Puy Moné

Ya yera ora de fer y de parar bella autibidá de bizicleta en o lugar, en dó podamos partizipa-ie toz. S'ha presto una mena de "San Silvestre" en B.T.T. t'o diya 30 d'abiento , a ras 11.30 oras, que puya ta Puy Moné (1303 m.) con salida en o lugar (Pabellon Polibalen). No más son 10 kilomtros y se mira de fer una borina ziclista ta despedir l'año, no tiene carauter competitibo y ye debaldes, l'unico premio ye pasar-lo bien, y redir-se tot posible.

Tot isto ye posible a ra organizazión de José Antonio Calvo y d'iste mesmo blog, que combidaran a caba a toz que i puyen y partizipen en a marcha. Se mira de chuntar a mayor cantidá posible de ziclistas de toz os rans y que cadagún i puye a ra suya marcha.

Animate-ie y puya ta Puy Moné con a tuya bezi!! que millor traza de rematar l'año beyendo os paisaches de toda la redolada dende iste puesto?!

...cabo d'año esportibo

Rematamos l'año y femos un chiquin repaso a ras collas t'analizar lo feito and'agora. ¿Que cal dizir d'o Puyal C.F.? ha dao un brinco de calidá en ista añada y dize adios a l'año ganando contra Sos C.D. por tres gols a un, un resultau prou chusto si rezentamos a delera que bi eba en fer un buen partiu. En cheneral s'ha bisto una amilloria en a colla y o ran de chuego, y ya en son son dezimos en a clasificazión a bels pcos puntos d'os primers puestos... son estaus una d'as sorpresas en iste ran y encara lis manca asabelo que dizir a resta d'a liga.

Cal remerar o prousimo dia 29 d'abiento se fera una zena en Luesia en a que yes combidau , en dó bi estaran toz os chugadors y afizión, (podez eslexir dentre dos menus) dimpues bi abra borina y baile.

Por otro costau os nuestros amigos d'Asín, o corraldebartolo.com rematan l'año estando campiones d'ibierno, aluzernante!! en a suya primer añada en o ran de Plata, dimpues de que puyaran a zaguera temporada. A rasmia y delera que contrimostran be d'estar o secreto d'iste ecsito esportibo. Toz somos bien argüellosos d'els y asperamos beyer-los iste nadal por Luesia.

Aqui tos dixo un bideo resumen d'e l'año:

Cultura y esporte por a integrazión en Fuencalderas

Una begada más, Ricardo Garcés, nos dio un platero exemplo de solidaridá y de luita por a integrazión parando una trobada por a integrazión d'os disminuius d'ASIMAZ de Fuencalderas. Iste auto organizato a pachas dentre Fuencalderas y Luesia , consistia en una larga chornada plena d'autibidaz y esporte en a Billa, dende chuegos y esportes tradizionals, anda un partiu de futbol dentres os más chobens de Fuencalderas con a colla infantil d'o Puyal C.F.

En a chenta , que se fizo serbir como remanataza d'a chornada, dó nos chuntamos buen camatón de chen, bels chugadors d'o Puyal C.F., Chusé Alegre como representan de l'Asoziazión Cultural Fayanas, chen y amigos de Fuencalderas y de Luesia... pasamos buen ratico y tamien i estio un chiquin omenache a Ricardo, qui tanto le'n merexe por tot o treballo y rasmia en a luita por a integrazión....y ramatemos a tardi cantando buena Jota con os amigos d'ASIMAZ.

Un'abraza ta toz y aspero tornar a beyer-nos lugo!

Rematau o VII Concurso de Fotografia Rural

Como ya yera sabiu, dende fa bels diyas, y tamien meso en istas ringleras, iste cabo semana s'amostron todas as obras de fotografia d'o VII Concurso de Fotografia Rural, organizau, como no, por l'Asoziazión Cultural Fayanas; en o Pabellon Polibalen.

Bi eba tres rans: Cheneral, premio naturaleza y premio por botazión populas ta ras obras de Luesia. Cal dizir o numero de partizipans estiaño estio muito numeroso, con obras bi plegadas de muitos puestos d'o País, mesmo de difuera,y de muito ran. Asinas se consolida iste Concurso en os calendarios d'os amantes d'a fotografia.

Podez beyer as obras premiadas en :http://www.acfayanas.org/fotografia.html

Y animatos a partizipar-ie cara l'año binien!

¿Dó ye Luesia?

Parix que en bels meyos de comunicazión o mesmo en o rete, que se suposa que ye a "biblia" d'a informazión no se nos tiene en cuenta. Isto ye una imachen d'o mapa d'As Zinco Billas que he pillau en a seczion de torismo de Red Aragón (Portal d'entrada a internet ta toz os aragonesés; como asinas se uato definen) ¿igual ye que nos nos consideran aragoneses?, o ¿Igual ye que no bi ha torismo en o lugar?¿ Igual ye que no tenemos dreito a salir-ie por que i somos pocos?... o quesio, pero lo que si se, ye que tenemos que fer-nos sentir y chilar, por que istas cosas no nos pueden pasar, antimás cuan somos asperando que declaren Lueisa Bien de Intres Comun. No me cuaca pensar mal d'a chen y menos d'os bezins que s'amedrantan cuan se i amana o lupo pero.... Si querez fer una queixa lo podez fer en www.redaragon.com/info/contacto.asp, yo he feito a mia.

lo podez beyer en :http://www.redaragon.com/turismo/mapas/cvi.asp Se diz que os de Lueisa no somos en o mapa...chumba la chumba la chun.....!!! Y tamien manca de meter Lobera D'Onsella , Os Pinatanos, Malpica D'Arba....!! aluzernante !!!

A comarca estrena en Luesia una ruta de bials y camins

A Comarca, Adefo Zinco Billas y Zider Prepirineo, han presentau en Luesia o nuebo rete de bials y camins por a redolada, asinas como una topoguia que incluye 21 tripticos archibados en un aczesorio de plastico.

Con un coste aprocsimau de 130.000 euros y 250 kilometros de bials y camins balizaus, iste proyeuto ye clau ta dar a conoxer as cualidaz meyoambientals d'a redolada.Jose Luis Pola, presiden d'a Comarca inzide que dende ista instituzión se treballa ta estudear os puntos fuertes de cada poblazión "d'ista traza podemos treballar en positibo, ya que grazias a proyeutos como iste de promozión toristica podemos bertebrar o territorio y fixar chen en os lugars". José Luis Abenia delegau de promozion toristica d'a comarca , comenta que os beintiun bials marcaus tienen esferens dificultaz " a dificultá ye prou bariada, bi ha rutas familiars d'una ora, y más esportibas que'n plegan a durar seis oras.Tamien a topografia marca a dureza d'as rutas". L'obchetibo ye fomentar unatra traza de fer torismo en a comarca, si ya esiste o torismo cultural " queremos plenar a ufierta con rutas meyoambientals. Dar más posiblidaz t'o biachero que bi s'amana".

Aqui tos dixo un bideo, encara que sia en castellano:

¿O gaitero d'o lugar toca o mesmo u toca mal? LUNA 2- PUYAL C.F. 2

Peren s'ha dito que can qu'escañuta rai, pero agora ye de dar que a colla royiblanca escañuta y muerde , y lo fan con razón antimás de con rasmia. Pues o pasato domingo 2 d'Abiento empato a dos gols en casa d'o lider, dimpues d'ir ganando dos gols a uno. Os gols estión marcaus por Cesar y Raúl, que contimuestran o suyo gran estau de forma, pero uno d'os protagonistas d'a chornada estio o canzerbero royiblanco , o lunero Javi Lasierra "Usia", que se concarba a la suya ex-colla, con a presión que teneba. Con tot y con ixo a suyas interbenzions baixo l'arco estio fundamentals cara'l resultau final; un gran patiu por parti de "Usia" , e ista begada si que cal dizir que o gaitero d'o lugar toco de puta mai!

O procsimo partiu se chuega con Sos C.D. en o campo local de Rivas